1 сыйныфка укырга керүче балаларга акча биреләчәк

КАМАЗ үз хезмәткәрләренә ярдәм итәргә карар иткән. Балалары беренче сыйныфка баручы әти-әниләрнең чыгымнары чыннан да зур.

Ел саен үткәрелә торган «Мәктәпкә җыенырга ярдәм ит» акциясе кысаларында һәр хезмәткәргә баласын мәктәпкә әзерләү өчен дүрт мең сум акча бүлеп биреләчәк.

Бу акчаны мәктәп формасы, канцелярия товарлары һәм башка кирәкле әйберләр сатып алуга сарыф итәргә мөмкин булачак. Сумма хезмәт хакы белән бергә күчереләчәк.

КАМАЗ елдан-ел әлеге акцияне дәвам итеп килә. Узган ел балалары укырга баручы әти-әниләргә канцелярия товарлары сатып алуга  2 мең сумлык сертификатлар бирелде. Әлеге изге гамәлне үрнәк итеп алып, башкалар да КАМАЗлылар рәтенә кушылсын иде.