Булачак мәктәпкә бүгеннән үк барасылары килә!

Хәзердән үк балаларын шул мәктәпкә укырга бирергә теләүче ата-аналар шалтыра башлаган. Бу турыда «Татар-информ» мәгълүмат агентлыгына Татарстан Дәүләт Советы Рәисе урынбасары, Татарстан Тарихи һәм мәдәни һәйкәлләрне торгызу республика фонды башкаручы директоры Татьяна Ларионова хәбәр иткән.

– Булачак мәктәптә балалары укуларын теләгән ата-аналардан күпме шалтырату булганын белсәгез иде, – дигән агентлык әңгәмәдәше.
Республикада өч телдә белем бирә торган комплекс булдырырга Татарстан Дәүләт Киңәшчесе Минтимер Шәймиев тәкъдим итте.

– Болгар һәм Зөя утрау-шәһәрчеген торгызу эшләрен төгәлләгәч, «Яңарыш» фонды Россия һәм Татарстан Мәгариф һәм фән министрлыклары белән бергә уникаль мәгариф проектын башларга ниятли. Ул күп профильле мәктәп, балалар бакчасы, балалар өчен интернат һәм шәһәр яны балалар лагереннан торган гомуми белем бирү комплексы, – дигән иде Минтимер Шәймиев  Болгар һәм Зөяне торгызу проекты тәмамлануга багышланган тантаналы чарада.

Мәктәп Казанның 165 нче мәктәбе базасында «Адымнар – белемгә һәм татулыкка» исеме астында эшләяәчк. Татарстан Президенты Рөстәм Миңнеханов киләсе елда мәктәпкә янкорылма төзү карарын хуплады.
Татьяна Ларионова проектны гамәлгә ашыру стадиясе турында: «Бары тик әзерлек эшләре генә бара. Бу бер көндә эшләнелә торган түгел. Элек проект булырга тиеш, әле хәл ителәсе мәсьәләләр күп», – дигән.