Казан мәктәбе янында өләшкән бананнар наркотиклымы?

Шулай ук Казан мәктәпләре тирәсендә яхшы киенгән бер хатын-кыз укучыларны фотога төшерәм дип ияртеп китә икән дигән хәбәрләр дә ватсап аша килде. Россия Эчке эшләр министрлыгының Казан буенча идарәсе матбугат хезмәтеннән алынган мәгълүматлар буенча, әлеге шикле хатын-кыз турында беренче тапкыр ишетәләр. Бу хакта гариза булса, алар шунда ук тикшерү эшен башлаячаклар.

Ә менә бананга кагылышлы хәбәр полициягә килгән. Хокук саклаучылар Вахитов районындагы бу мәктәп территориясен тикшергәннәр, камера язмаларын анализлаганнар, шаһитлардан сораштырганнар, бананнарны экспертизага тапшырганнар. Кыскасы, бананда наркотик барлыгы ачыкланмаган. Ә җиләк-җимешне «Изгелек көне» уңаеннан Казанның иҗтимагый оешмаларының берсе тараткан икән. Бу җәмгыятьтәге 19 һәм 40 яшьлек ике кешедән сорау алганнар. Алар флеш-мобны мәктәп администрациясе белән килештермичә оештырган булганнар. Бананнан зыян күрүчеләр ачыкланмаган.

Социаль челтәрләр, ватсап аша таралган хәбәрләрнең күбесе дөреслеккә туры килмәсә дә, тагын бер кат сак булырга кисәтә.