1 февральдән пенсияләр 75 мең була?!

Кышның соңгы аена аяк бастык. Февраль аенда шактый законнар гамәлгә ашырыла башлый. Аларның күбесе социаль түләүләргә бәйле.

1 февральдән алып социаль түләүләргә индексация ясала. Индексацияне 2018 елдан алып, инфляциягә бәйле рәвештә, елга бер тапкыр ясыйлар.

Түләүләргә килгәндә, 1 февральдән алып инвалидларның, ветераннарның, Чернобыль һәлакәтенә катнашы булганнарның, Россия Геройларының һәм сәнәгать өлкәсендә зыян күргәннәрнең пенсияләре артачак.

Моннан тыш, федераль ташламаларга хокуктан файдаланучы 15 млн Россия халкының да пенсияләре үсәчәк. Бу исемлеккә инвалидлар, сугышчан хәрәкәтләр ветераннары, радиация йогынтысына дучар булган затлар, Советлар Союзы һәм Россия Геройлары, шулай ук Социалистик Хезмәт Геройлары һәм ташламага ия булган кайбер башка категорияләр керә.

Ай саен түләнелә торган акчаларның иң зурысы Советлар Союзы Геройларына һәм Россия Геройларына бирелә. Узган елның беренче февраленнән бу сумма 70 мең сум чамасы тәшкил итсә, 2022 елның 1 февраленнән пенсия күләме 75 сумнан артып китәчәк.

Социаль хезмәтләр җыелмасына керә торган айлык түләүләр суммасы да арттырылачак. Закон нигезендә ул натуралата яисә акчалата бирелергә мөмкин. 2021 елдагы индексациядән соң бу сумма 1200 дән бераз гына артык иде.

1 февральдән алып эшләми торган пенсионерларны җирләү өчен бирелә торган акча күләме дә арттырылачак. Бу акчаларны Россия Пенсия фонды түли. Ил күләмендә әлеге матди ярдәм 7 мең сум тирәсе булачак. Мәскәүдә исә вафат булган пенсионерның туганнарына 19 мең сум чамасы ярдәм күрсәтелә.

Инде күп тапкырлар әйтелгәнчә, 1 февральдән ана капиталы да үсә. Беренче бала өчен бу түләү 483,9 сумнан 524,5 сумга,  икенче бала өчен 693,1 сумга кадәр җитәчәк.

Индексация балалы гаиләләргә бирелә торган кайбер пособиеләргә дә кагыла. Мондый түләүләр арасында - йөклелек һәм бала табу буенча пособиеләр, эшләмәүче гражданнар өчен 1,5 елга кадәр баланы карау буенча пособиеләр, бала тапканда бер тапкыр бирелә торган пособие, радиоактив йогынтыга дучар булган гражданнарга компенсацияләр һәм социаль ярдәмнең башка чаралары бар.