Африкада – Дакар, ә Татарстанда – КышДаКар

«Эшлекле дүшәмбе» киңәшмәсендә туристлыкны үстерү комитеты җитәкчесе Дарья Санникова хәбәр иткәнчә, республика фермерлары һәм үзмәшгульләре Яңа ел көннәрендә Казанда «КышДаКар» фестивале үткәрә. Быел әлеге чара ике урында – «Казан» гаилә үзәге каршында һәм Бауман урамында «Кремль» метро станциясе тарафында оештырыла.

– Республика җитештерүчеләре авыл хуҗалыгы продукциясе, сувенирлар, чыр­шы уенчыклары тәкъдим итә. Махсус рецепт нигезендә пешерелгән үрдәкләр, шулай ук сыр­лар һәм фермер продукт­ларыннан ясалган тортлар сатып алырга мөмкин. Ачык һавада туңып китсәгез, үләннәр салып пешерелгән татар чәе табынына рәхим итегез! – диде Дарья Санникова.
Фестиваль мәйданнарында осталык дәресләре, конкурслар һәм акцияләр дә оештырыла. Балалар өчен аерым зона эшли.

 «КышДаКар» фестивале – Бауман урамында 25 декабрьдән киләсе елның 7 гыйнварына кадәр 12.00-20.00 сәгатьләрдә, ә «Казан» гаилә үзәге каршындагы мәйданда 27 декабрьдән киләсе елның 7 гыйнварына кадәр 12.00-22.00 сәгатьләрдә эшли.