Алексей Песошин Татарстанда тарифларның күпмегә артачагын әйтте

Татарстан Премьер-министры Алексей Песошин Дәүләт Советы депутатлары каршында хисап тотты һәм аларның сорауларына җавап бирде. Парламент вәкилләре торак-коммуналь хезмәтләр өчен бәяләр арту белән кызыксынды.

“2021 ел азагында 2022 елның 1 июленнән торак-коммуналь хезмәтләр өчен артырга мөмкин булган бәяләр нормативлары кабул ителде. Аның нигезендә, бәяләр 6,2 процентка кадәр арта ала. Моннан тыш аерым очракларда, бу нормалар арттырылырга мөмкин. Мисалга, инвест программалар гамәлгә ашырылмаса. Тарифлар барысы да кабул ителгән. Алга таба нәрсә булыр, белмибез. Әмма башкалары әлегә күздә тотылмый”, - диде Татарстан Премьер-министры Алексей Песошин.