#Кыскача яңалыклар 02 июль 2019, 18:24

«Алтын каләм»не эзләп...

02 июль 2019, 18:24

Иртәгә «Алтын каләм» балалар, яшүсмерләр һәм яшьләр республика матбугат фестивале егерме дүртенче тапкыр яшь иҗатчыларны үзенә җыя. 1996 елдан бирле үткәрелгән әлеге чарада ун меңнән артык бала катнашкан. Быел 3-7 июль көннәрендә 120 мәктәп укучысы «Волга» яшьләр үзәгендә кабат көч сынашачак.

Скопировать ссылку

Фикерле, каләмле балалар республика турларыннан сайлап алына. Быел да Әлмәт, Түбән Кама, Болгар һәм Казан шәһәрләрендә яшь каләмчеләр белән очрашулар узды. «Алтын каләм» фестивале аша иҗатка тартылган укучылар үз-үзләрен сынап карый, журналист һөнәренең үзенчәлекле яклары белән таныша ала. Монда беркем дә ял итәргә, күңел ачарга да килми. Бирегә һәркем эшләргә дип килә. Фестивальдә журналист һөнәренең төрле юнәлешләре буенча укулар, мастер-класслар, практик дәресләр үткәреләчәк. Иң мөһиме балалар үзләрен редакцияләрдә эшләүчеләр кебек тоеп карый алачак. Алар татарча һәм русча газета чыгара, шулай ук ике телдә дә телевидение һәм радио тапшырулары әзерли алачак. Мультимедиа, фотожурналистика, дизайн һәм верстка буенча да аерым төркемнәр оештырыла. Татарстан Республикасы Яшьләр хөкүмәте рәисе Алла Абросимова сөйләвенчә, быел фестивальдә видео-блогинг юнәлешендә эш алып барылачак. Әлеге төркемдә эшләүчеләр берничә көн дәвамында барлык булган мәгълүматны трансляцияләп барачак.

Фестивальнең төп темалары Бөтендөнья эшче һөнәрләре чемпионаты һәм Татарстанда эшче һөнәрләре елы, Татарстан республикасында яшьләр сәясәтенә 25 ел, ТАССР 100 еллыгы, 2019 ел Россиядә театр елына багышланган.

«Алтын каләм» – иҗат мәктәбе. Мәктәп укучылары биш көн эчендә шушы дөньяда кайнаячак, белгечләр белән очрашачак. Быел, оештыручылар әйтүенчә, балаларны төрле пресс-турлар, конференцияләр, дәүләт дәрәҗәсендә очрашулар да көтәчәк. «Алтын каләм» фестиваленең оештыручыларның берсе, Татарстан Дәүләт Советы Рәисе урынбасары Римма Ратникова әйтүенчә, фестивальнең башлангыч чорында югары белемгә, бигрәк тә журналистикага кызыксынучылар аз була. Бүгенгеләр исә бу һөнәргә аңлы рәвештә тартыла. Катнашучыларның хәзер иҗат папкалары да тулы. Фестивальне оештыручы, Татарстан журналистлар берлеге рәисе Илшат Әминов та бүген үз эшен камил белгән, журналистика законнарын аңлаган, жанрлар теориясен үзләштергән белгечләргә һәрвакыт ихтыяҗ зур булуын билгеләп үтте. Шул ук вакытта ул әлеге һөнәргә карата кызыксыну артуын да билгеләде. «Журналистикада белемле белгечләр һәрвакыт кирәк. Бүген икетелне дә камил белгән, иртәгә өч телне яхшы үзләштерүчеләр кирәк булачак», – дип белдерде ул.

Фотолар: tatar-inform.ru

Кызыклы яңалыкларны күзәтеп бару өчен Т елеграмга кушылыгыз.

#«Алтын каләм» #Алтын каләм