#Кыскача яңалыклар 27 ноябрь 2018, 10:50

Арбаны кыштан әзерләргә кирәк

27 ноябрь 2018, 10:50

«Әгәр бүген минераль ашлама җыю өстендә эшләмибез икән, җитди нәтиҗәләргә һәм үзгәрешләргә ирешә алмаячакбыз», – дигән Татарстан Президенты Рөстәм Миңнеханов Татарстан хөкүмәте йортында узган республикакүләм киңәшмәдә.

Скопировать ссылку

Татарстан авыл хуҗалыгы һәм азык-төлек министры Марат Әхмәтов сүзләренчә, минераль ашламалар сатып алу бик чыгымлы.

– Уртача уңай һава торышы булган очракта, 5 миллион тоннадан артык ашлык алу һәм башка культуралар буенча да икътисади яктан акланган уңыш алу өчен, бер гектарга 100 кг тирәсе ашлама кертергә кирәк. Әмма бүгенге финанс проблемалары аркасында, 2019 ел уңышы өчен гектарына 70 кг ашлама кертү бурычын куябыз. Республика буенча бу 8,5 миллиард сумга төшәчәк, – дигән ул.
Аның сүзләренчә, 2019 елда 2,9 миллион гектарда чәчү эшләре алып бару өчен, 2 миллиард сумнан артык акча каралган. Чәчүлек кампаниясенә, беренче эшкәртүне дә исәпкә кертеп, республика буенча уртача 20 млрд сумнан артык акча кирәк, бу уртача – бер гектарга 6,5 мең сум дигән сүз.
Марат Әхмәтов әйтүенчә, гомумән алганда, республика буенча орлык җитәрлек.
Татарстан Президенты Рөстәм Миңнеханов хуҗалыкларның ихтыяҗларына бәя бирү, шулай ук банк документларын рәсмиләштерергә өйрәтү буенча эш алып барырга өндәде. Моннан тыш, ул шәхси хуҗалыклар белән эшләрне активлаштырырга, аларны республика проектларына җәлеп итүне дә сорады.

Кызыклы яңалыкларны күзәтеп бару өчен Т елеграмга кушылыгыз.