Авыл хуҗалыгы ярминкәләре киләсе елның маена кадәр дәвам итәчәк

Татарстан авыл хуҗалыгы һәм азык-төлек министрының урынбасары Ришат Хәбипов хәбәр итүенчә, ярминкәләрне халык үз итә, шуңа аларны Яңа елга кадәр генә түгел, ә 9 майга кадәр дәвам итәргә карар кылынган. Бу хакта ул форумның "Агросәнәгать комплексында яңа технологияләр һәм ысуллар" темасына багышланган утырышында билгеләп үтте.

"Татартан Президенты Рөстәм Миңнеханов йөкләмәсе буенча, инде берничә ел рәттән көзге-кышкы чорда шимбә саен республикада авыл хуҗалыгы ярминкәләре үткәрелә. Без аларны таш яуса да, кар яуса да уздырабыз. Шул рәвешле, хуҗалыкта җитештерелгән товарлар турыдан-туры кулланучыга килеп ирешә", - дип искәртте министр урынбасары.

Узган ел авыл хуҗалыгы ярминкәләрендә 1,5 миллиард сумлык продукция сатылган.

^{Татар-информ}