Авыл хуҗалыгы терлекләре коронавирус белән авырмый

ТР Министрлар Кабинеты каршындагы Баш ветеринария идарәсе башлыгы Алмаз Хисаметдинов журналистларга хәбәр иткәнчә, авыл хуҗалыгы өлкәсенә караган тармак буларак ветеринария хезмәтендә эшнең туктаганы юк.

- Вируска каршы көрәш таныш безгә. Африка чумасы, кош гриппы кебек авырулар белән очрашканыбыз булды, - диде ул. – Бүген исә мал табиблары терлекләргә вакцина ясый. Лейкозга, туберкулезга һәм башка авыруларга тикшерә. Гомумән алганда, язгы эпизоотик чараларның 75 проценты үтәлде. Ай ахырына кадәр шәхси хуҗалыклардагы терлекләрне вакцинацияләүне тәмамлаячакбыз. Май азагына зур хуҗалыкларда да эшне бетерергә уйлыйбыз.

Сүз уңаеннан: лейкоз белән зарарлану республикада 11 проценты тәшкил итә. Соңгы биш елда лейкоз очракларын ике тапкырга киметә алганнар. Биш ел элек бу күрсәткеч 24-25 процентны тәшкил итә иде.

Ветеринария табиблары урамнарны, биналарны коронавируска каршы дезинфикцияләү эшләрендә дә катнаша икән. Коронавирус дигәннән, журналистлар бу шартларда йорт хайваннарын ничек тәрбияләргә кирәклеге турында сорашты.

Матбугат очрашуында катнашкан ветеринария табибы Максим Шкатов әйтүенчә, этләрне урамга алып чыкмыйча булмый. Аннан кергәч, әлбәттә инде, тәпиләрен яхшылап юасы була.

- Кешеләр төрле антисептиклар куллана, ә өй хайваннарына алар килешмәскә мөмкин. Шулай да алар өчен махсус эшләнгән ветеринария антисептикларын файдалана аласыз. Ә болай тәпиләрен яхшылап юу да җитә, - диде ул.

Вирусның кешеләрдән терлекләргә яки киресенчә алардан кешеләргә күчү-күчмәвенә дә ачыклык кертте белгечләр. Алмаз Хисаметдинов әйтүенчә, эт-мәчеләр бу чир белән авырмый, әмма ишек тоткасы, телефон кебек аны йоктыру чыганагы булып тора алалар. Шулай ук мөгезле эре терлекләр дә коронавирус белән авырмый. Авыл хуҗылыгы продуктларында вирус бар дип куркырга кирәкми.

- Без Мәскәү, Санкт-Петербургтагы хезмәттәшләребез белән киңәшләштек, алар да хайваннарның коронавирус белән авырган очрагы юк, дип белдерде. Хайваннарда коронавирусның башка төрләре булуы бар, алар күптөрле бит, - диде ул.

Ә менә хуҗасы чирләп китеп, эте яки мәчесен карап торырга кешесе булмаса, аларны зоокунакханәгә урнаштырырга мөмкиннәр икән. Казан шәһәренең баш ветеринария табибы Тимур Галиев хәбәр иткәнчә, мондый очраклар була калса, 234-75-61 телефон номерына шалтыратырга була. Махсус автотранспорт белән этегезне алып китәләр. Бу хезмәт түләүле, шулай да бушлай ярдәм күрсәтә алабыз, диде ул. Ә менә хайванны ашатып, карап торган өчен түлисе була