«Бердәм рентгенолог» ярдәмгә килә

Авыр хәлдә хастаханәгә эләккән, гомеренә куркыныч янаган кешеләргә «Татарстанның бердәм кардиолог-рентгенолог» хезмәте тиз арада медицина ярдәме күрсәтү мөмкинлеге бирә.

- 2006 елда медицина тармагында модернизацияләү башланды. Бик күп заманча техника кайтартылды. Аларны нәтиҗәле куллану мөһим бурычларның берсе иде. Бер аппаратка өч-дүрт тәҗрибәле белгеч кирәк. Табиблар җитми. Без йә өстәмә кадрлар әзерлибез, йә бердәм система булдырабыз дигән фикергә килдек. Соңгысы отышлырак булып чыкты. Татарстан буенча рентгенология өлкәсендәге иң тәҗрибәле 35 табибны тупладык. Алар «Бердәм рентгенолог» хезмәтендә график буенча кизү торачак, - ди Татарстан Сәламәтлек саклау министрлыгының Диспетчер үзәге директоры Ростислав Туишев.

Төнге сәгатьләрдә медицина ярдәме күрсәтү көндезге кебек үк югары дәрәҗәдә булсын өчен, тәҗрибәле белгечләр таләп ителә. Бу эшне нәкъ менә шул сайлап алынган 35 табиб башкарачак. Республика буенча кизү торучы дип тә әйтергә була аларны. Авырулар турында мәгълүмат кизү табибка республиканың төрле районнарыннан киләчәк. Ул аларны «укып», тиешле диагноз куячак. Район җирендәге авыруларга тиз арада медицина ярдәме күрсәтүдә бу аеруча мөһим. Авыруларга ерак аралар үтеп Казан хастаханәсенә килергә кирәк булмаячак, килгән очракта да анализлар, тикшеренү сурәтләре махсус базада сакланачак.

«Бердәм рентгенолог» хезмәтеннән республиканың дистәдән артык медицина учреждениесендә: Чаллы, Чистай, Бөгелмә, Яшел Үзән, Әлмәт, Саба, Арча, Буа һәм башка район хастаханәләрендә файдаланырга була. Анда кардиология, рентгенологиягә кагылышлы барлык заманча аппаратлар бердәм хезмәткә тоташтырылган. Хәтта «ашыгыч ярдәм» машиналарындагы аппаратлар да читтә калмаган. Авыр хәлдә хастаханәгә эләккән кешенең анализларын, тикшерү сурәтләрен электрон рәвештә Казанга, республика буенча кизү торучы табибка юллыйлар. Ул, уртача, 30 минут эчендә диагноз куя, авыруны ничек дәваларга кирәклеген әйтеп, нәтиҗә чыгара. Әлеге хезмәт авырулар өчен бушлай башкарыла.

Сүз уңаеннан, шушы көннәрдә генә Татарстанның Сәламәтлек саклау министрлыгы Сахалин хастаханәләре белән килешү төзегән. Хәзер безнең табиблар Сахалиндагы авыруларга да дистанцион рәвештә диагноз куячак. Киләчәктә күрше төбәкләр дә бу бердәм хезмәткә кушылыр дип көтелә.