«Безнең бурычыбыз - аларга ярдәм итү»

Татарстан Яшьләр эшләре министрлыгы үзенең психологик-педагогик үзәкләре нигезендә, әти-әнисе яки туганнары махсус хәрби операциядә булган балаларга психологик ярдәм күрсәтү эшен оештырган. Мондый оешмаларның кайнар линиясенә инде 1 меңгә якын шалтырату килгән. Бу хакта «Үзеңнекеләр турында кайгырту» («Забота о своих») республика программасына багышланган матбугат конференциясендә Татарстан Яшьләр эшләре министры урынбасары Айгөл Сабирова сөйләде.

— Иң элек без әти-әнисе махсус хәрби операциядә булган балалар белән эшлибез. Аларның күбесендә эмоциональ киеренкелек, борчылу бар. Бу гадәти күренеш. Әмма кайберләренә психологик ярдәм таләп ителә, — диде ул. — Бүгенге көндә без җылы өйләребездә, рәхәттә яшибез. Бездән читтә, махсус хәрби операциядә булган егетләрне кайгырту, аларга ярдәм итү – безнең бурычыбыз. 

Сабирова сүзләренчә, эш медицина үзәкләре психологлары белән бергә төзелә. Ярдәм алу өчен гражданнар тәүлек әйләнәсе эшли торган кайнар линиягә мөрәҗәгать итә ала. Балалар өчен — 8-800-2000-122 һәм яшьләр өчен 8-800-555-22-20.

— Ышаныч телефоннары эшләү дәверендә 1 меңнән артык шалтырату кабул иттек һәм алар буенча тиешле эш алып барыла, — дип билгеләп үтте ул.

МХОда катнашучылар, аларның гаиләләре һәм балалары өчен ярдәм итү турында барлык мәгълүмат тупланган сайт эшли башлады. zabotasvo.tatar сайтында федераль һәм төбәкара дәрәҗәдәге ярдәм чаралары турында мәгълүмат бар.

Мәсәлән, биредә МХОда катнашучылар һәм аларның гаиләләренә нинди ярдәм чаралары тиешлеген белергә була. Сайтта шулай ук гуманитар ярдәм өчен акча һәм әйберләр җыючы хәйрия фонды турында мәгълүмат бар.