Әби-бабайларны биергә, фотога төшәргә һәм социаль челтәрләрне кулланырга өйрәтәләр

Активрак булганнары исә мәдәният йортлары каршында эшләп килгән түгәрәкләргә йөриләр. Тиздән аларның саны артыр дип көтелә. Ни өчен дигәндә, нәкъ менә алар өчен "Тормыш сөючеләр" клублары челтәре барлыкка киләчәк. Алар Казанның төрле районнарында оеша. Сораштырулардан күренгәнчә, шәһәр әби-бабайлары биергә, фотога төшерү осталыгына өйрәнергә, спорт белән шөгыльләнергә тели икән.

Иң беренче булып клублар челтәре үз эченә «Юность», Ленин исемендәге мәдәният сараен, Дәрвишләр, Урман арты, Тынычлык бистәләрендә урнашкан мәдәният йортларын, «Московский» мәдәният үзәге, 15 нче китапханәне һәм шулай ук Зәкиев урамында урнашкан китапханәне алыр дип көтелә.

Пенсионерларга бушка театр, вокал һәм бию студияләренә йөрергә мөмкин булачак, фотосәнгать осталыгына, кул эшләренә өйрәнә алачаклар. Скандинавия йөреше, дәвалану физик культурасы, пилатес белән шөгыльләнәчәкләр. Смартфоннан, социаль челтәрләрдән кулланырга өйрәнәчәкләр. Төрле темаларга кызыклы лекцияләр тәкъдим ителәчәк. Клублар 1 декабрьдән эшли башлар дигән ният бар.