Эчү тыелмый, сату – тыела

Менделеев шәһәрендә яшәүче бер хатынны шайтаннар: "Сат-сат!" - дип котыртып тора, күрәсең. Татарстан Республикасы Дәүләт алкоголь инспекциясенең Чаллы территориаль органы хәбәр итүенчә, әлеге хатын самогон сатканда бер фаш ителгән булган инде. Административ җавапка тартылса да, тәүбәгә килмәгән янә закон бозырга керешкән.

Өй шартларында, сату максатында, этил спирты катнашмалы сыеклыклар әзерләсәң, Татарстан Республикасы Административ хокук бозулар кодексының 2.8 маддәсе нигезендә 3 мең сумнан 5 мең сумга кадәр штраф салына, продукция конфискацияләнә. Әлеге хатын да өендәге алты литр самогонын үз ихтыярында хокук сакчыларына чыгарып биргән. Тагын штраф түләргә туры киләчәк.

Менделеев шәһәрендә согы ике атнада маркасы булмаган спиртлы эчемлек сатуның да ике очрагы теркәлгән. Россия Эчке эшләр министрлыгының Менделеев районы буенча бүлеге хезмәткәрләре Менделеев шәһәрендә яшәүче кешенең машинасыннан, ялган маркалы булуда шикләнеп, ике тартма аракы тартып алган. Икенче бер хатын күршесенә ялган маркалы аракы саткан. Тагын ике шешә "шайтан төкереген", ягъни ялган аракысын хокук сакчыларына үз ихтыярында тапшырган. Тартып алынган алкоголь продукциясе тикшерүгә җибәрелгән.

Бу фактлар буенча Россия Федерациясе Административ хокук бозулар кодексының 4нче бүлегенең 15.12 маддәсе нигезендә административ эш кузгатылган. Маркасы һәм мәгълүматлары булмаган товарны саткан, саклаган яки алып барган өчен гражданнарга 2 мең сумнан 4 мең сумга кадәр штраф каралган. Җитәкчеләргә 5 мең сумнан 10 мең сумга, ә юридик затларга 50 мең сумнан 300 мең сумга кадәр штраф түләттерелә. Моны хәтерегездән чыгармагыз, чөнки, законны белмәү барыбер дә җаваплылыктан азат итми.