«Хәләл продукт ул ислам бренды гына түгел, ә бер зур сыйфат брендына әверелде»

Татарстан мөфтие Камил хәзрәт Сәмигуллин фикеренчә, чараны оештыручы "Хәләл" комитетына бик күп предприятиеләр мөрәҗәгать итә һәм комитет аларның ышанычын аклады. Мөселман кешесе өчен хәләл ризык белән туклану бик мөһим, шуңа да хәләл продуктка ихтыяҗ һәрчак булачак.
Күргәзмә ачылу тантанасында катнашкан Татарстанның авыл хуҗалыгы һәм азык-төлек министры Марат Әхмәтов сүзләренчә, хәләл продукт ул ислам бренды гына түгел, ә бер зур сыйфат брендына әверелде һәм хәләл базарының киләчәге өметле.

Ямало-Ненецкий автоном округыннан килгән Вячеслав Сергатенко да шундый фикердә тора.
- Безнең "ЭКО ЯМАЛ" җаваплылыгы чикләнгән җәмгыяте төньяк кыргый болан итеннән ярымфабрикатлар җитештерә. Якын араларда хәләл продукция җитештерү цехы ачарга ниятлибез. Бу өлкәдә эш процессы бара. Соңгы елларда хәләл продукциягә ихтыяҗ артты. Шуны күз алдында тотып, хәләл ризык әзерли башларга кирәк дигән фикергә килдек. Ул гомуми продукциябезнең 15-20 процентын алып торачак. Хәләл продукцияне Көнчыгыш илләренә дә тәкъдим итеп була. Гомумән чит илдә төньяк болан итен Россиягә караганда күбрәк кулланалар. Без аларга йөз тотачакбыз. Эксперимент рәвешендә хәләл продукция чыгардык һәм бу эшкә ныклап торып алынырга ниятлибез. Татарстанның Хәләл комитеты белән хезмәттәшлек итәчәкбез, - дип сөйләде ул безгә.
Киргизиянең "Ата" кондитер фабрикасының эксперт буенча менеджеры Эмиль Камчибеков бирегә эшлекле контактлар табу, сату базарын киңәйтү, башкаларның тәҗрибәсе белән танышу өчен килгән.

- Россиядә мондый күргәзмәгә беренче гына тапкыр уза. Чарага үзебезне күрсәтергә һәм башкаларга карарга килдек. Продукциябезне күрсәтәбез, танытасыбыз килә. Фабрикада тәүлегенә 75 тонна ризык җитештерелә. Баллы риызкларыбыз Монголиягә, Кытайга, Иран, Таҗикстан, Казахстанга, Кавказга китә. Татарстан базарына да керәсебез килә. - ди ул.
Вологданың "Айсберри" туңдырма заводы исә хәләл продуктны яңарак кына чыгара башлаган.
- Махсус Казан өчен "Хәләл" туңдырма чыгара башладык. Тиздән супермаркетларда сатыла башлар дип өметләнәбез. Хәләл сертификатын Татарстанның "Хәләл" комитетыннан алдык. Хәләл туңдыра Казанда җитештерелми диярлек. Монда исә ислам кануннары белән яшәүчеләр бик күп, - ди заводның сату бүлеге җитәкчесе Лариса Барлева.

Күргәзмәдә хәләл ризыклардан тыш, хәләл хезмәтләр күрсәтү оешмалары да бар иде. "Хәләл" комитеты рәисе Марат Низамов сүзләренчә, проект дәвамлы булачак, аны киләчәктә зуррак мәйданда үткәрергә исәпләп торалар.