«Хәзерге заман баласын чебурашка белән генә җәлеп итеп булмый»

"Татар-информ" агентлыгында узган матбугат конференциясендә сүз шул хакта барды. Журналистлар белән әңгәмәгә Идел буе физик культура, спорт һәм туризм академиясенең өстәмә белем бирү үзәге җитәкчесе, авырлыгы артык булган балалар өчен "Үзгәрешләр җиле" исемле лагерь проекты авторы Татьяна Кириллова, балалар һәм үсмерләр ялын, мәшгульлеген һәм сәламәтләндерүне оештыручы "Җәй" республика үзәге директоры Раиль Муратов һәм Татарстан Яшьләр эшләре һәм спорт министрлыгының социаль программалар һәм өстәмә белем бирү бүлегенең әйдәп баручы белгече Рөстәм Йосыпов килгән иде.

- Быел җәй республикада 218 меңләп бала төрле лагерьларда ял итәчәк. 13 мең вожатый кирәк булачак. Ярый әле аларның күбесе берничә смена рәттән эшләргә риза. Шуңа 6-7 мең вожатый җитеп торачак, - диде Рөстәм Йосыпов. - Хәзерге заман баласының игътибарын чебурашка киемендә чыккан аниматор гына озак тотып тора алмый. Шуңа да замана әйдаманнарын алдан әзерләргә кирәк. Лагерьлар төрле юнәлештә, төрле төрдә булганга күрә, әйдаманнар да төрле булырга тиеш.

- Быел беренче тапкыр безнең академия әйдаманнар әзерләү курслары башлап җибәрде. Ул башлыча студентлар өчен, - дип яңалыклары белән уртаклашты Татьяна Кириллова. - Курсларга йөрүче (яшьләре 18- 64 кә кадәр) 350 булачак әйдаман 76 сәгать эчендә шәфкать туташы, психолог, әти-әнисеннән аерым яшәүче баланың чын дусты һәм ярдәмчесе дә булырга өйрәнүләрен зачет биреп расладылар. Бирелгән сертификатлар өч елга ярый. Аларны академиябезнең профессор-мөгаллимнәре бушлай укытты. Казан студентлары белән бергә Яр Чаллы, Түбән Кама, Чистай, Әлмәт һәм башка район яшьләре дә белем алды.

Хәзер балалар арасында симерү кебек чир көннән-көн арткан бер замандаТатьяна Кириллова алар өчен махсус лагерь оештырган. Менә өч ел инде бу лагерь уңышлы эшләп килә. Әлеге лагерьдан кайткач, балаларның 40 проценты спорт түгәрәкләренә йөри башлый.

"Җәй" директоры Раиль Муратов балаларыбызның җәйге ялы өчен бик күпләрнең җаваплы булуын җиткерде.
Йолдыз ШӘРАПОВА.