Иннә лилләһи вә иннә иләйһи раҗигун: танылган журналист вафат...

Күренекле журналист һәм җәмәгать эшлеклесе Мөслимә Шәфыйк вафат. Аны иртәгә Магнитогорск каласында җирлиләр. "Мөслимә ханым фани гомеренең соңгы айларында Магнитогорскида кызы гаиләсендә яшәде һәм бакыйлыкка күчте, - дип хәбәр итә "Ярдәм" фонды. - «Ярдәм» хәйрия вакыфында тәрбияләнгән, ике ел элек вафат булган Әлмирә Әдиятуллинаны югалтуны ул авыр кичерде. Чөнки Мөслимә апа белән Әлмирә апа гомерлек дус һәм фикердәш иде. Радио-журналист Мөслимә Шәфыйк Әлмирә Әдиятуллина турында: «Без университетта да бергә укыдык, аңа кадәр Тукай клубына да бергә йөри идек, гомер буе бергә булдык. Балалар да бергә үсте. Олы җитәкчебез, әйдәүче булды, хәзер ул безгә бик кирәк»,  — дип сөйләгән иде. Үзе исә «Татар-Ислам» интернет-газетасында чыккан соңгы мәкаләсендә: «Җәннәтләреңдә дә шулай бергә булуларны насыйп кылсаң иде, Раббым!» — дип язган булган. — Үз урының да Җәннәттә булсын! Иннә лилләһи вә иннә иләйһи раҗигун!"