Инвалид балалар өчен бушлай спорт залы эшли башлады

Алты яшенә кадәр алты операция кичергән. Үз тырышлыгы белән инвалидлар арбасын ташлап, аякка баса алган. Авырлыкларны җиңәргә спорт, көрәш төрләрен үзләштерү ярдәм итте, ди үзе. Лев Алимов бүген – Россия чемпионы, Идел буе районында өч тапкыр чемпион, каратэ-кёкусинкай буенча спорт мастеры.

Инвалид балаларга спорт тәрбиясе үзәге булсын дип бина сорап, Казан шәһәре мэрына хат юллагач, аңа уңай җавап килгән. Адоратский урамындагы бинаны аңа бушлай биргәннәр. Хәзер бинада ремонт эшләре төгәлләнеп килә. Бу эштә ярдәм кулы сузган барлык кешеләргә рәхмәтле әңгәмәдәшем. Спорт залы рәсми төстә 1 июньдә ачылыр дип көтелә. Дөрес, хәзер дә күнегүләр уза. Биредә 30га якын бала көрәш, гимнастика, бокс, башка спорт төрләре белән шөгыльләнә. Массаж бүлмәсе дә эшли. Пациентларын тәҗрибәле сукыр массаж ясаучы бушлай кабул итә.

Лев Алимов әйтүенчә, киләчәктә массаж бүлмәсендә арка баганасын, буыннарны яза торган җайланма да куелачак. «Иң мөһиме – физик мөмкинлекләре чикле балалар безгә килсеннәр, спорт ярдәмендә авыруларын җиңсеннәр, үзләрендә ышаныч тойсыннар иде. Инвалидларның төрлесе бар. Ныклап шөгыльләнгәндә, спорт өлкәсендә уңышка ирешергә була. Паралимпия уеннарында нәкъ менә дөм сукыр, тома чукраклар беренче урыннар яулый лабаса, – ди Лев Алимов.
PS. Инвалид балаларын Лев Алимовның физик үсеш һәм спорт тәрбиясе үзәгенә бирергә теләгән әти-әниләр редакциябезгә мөрәҗәгать итә ала. Биредә шөгыльләнү бушлай.