Ирек Миннәхмәтов вафаты уңаеннан республика җитәкчелеге кайгы уртаклашты

Татарстан Республикасы Президенты Аппараты Ирек Җәүдәт улы Миннәхмәтовның вакытсыз арабыздан китүе сәбәпле, гаиләсе, туганнары һәм якыннарының кайгысын уртаклаша.

Бүген республика Президенты Рөстәм Миңнеханов җитәкчелегендә узган хөкүмәт утырышы да, Ирек Миннәхмәтов вафаты уңаеннан, бер минутлык тынлык белән башланды.

Хәбәр иткәнебезчә, Ирек Җәүдәт улы кичә кич вафат булды. “Татспиртпром” оешмасының матбугат хезмәте җитәкчесе Марина Коновалова әйтүенчә, тренажерлар залында шөгыльләнгәндә, Ирек Миннәхмәтовның кинәт хәле начарланган. Аны тиз арада хастаханәгә илткәннәр, әмма коткарып кала алмаганнар. Эшмәкәрнең үлеме тромб өзелү белән бәйле булырга мөмкин, дип фаразлыйлар.

Мәрхүм белән хушлашу иртәгә Казанның Мәрҗәни мәчетендә узачак. Миннәхмәтовны Саба районы Миңгәр авылында җирләячәкләр.