Җитештерү тармагында имгәнеп үлү санын «ноль» күрсәткеченә төшерү карала

Хезмәт иминлеген саклау максатларында күп чаралар күрелә. Ләкин әлегә Россиядә эш урынында имгәнү алулар, чит илләр белән чагыштырганда, дүрт мәртәбәгә күбрәк, - диде республиканың хезмәт, мәшгульлек һәм социаль яклау министры Эльмира Зарипова «Татар-информ» агентлыгында узган матбугат конференциясендә.

Саннарга күз салсак, 2010 елда республикада эш урынында 100 кеше фаҗигале төстә үлгән, 1020 кеше төрле авырлыкта имгәнүләргә дучар булган.

Узган ел җитештерү тармагында - 35, ә быелның беренче кварталында җиде кеше үлгән.
- Эш урынында фаҗигале очраклар саны елдан-ел кими. Татарстан Президенты бурыч итеп куйганча, максатыбыз - җитештерү тармагында имгәнеп үлү санын «ноль» күрсәткеченә төшерү, - диде Эльмира Зарипова.

Министр республика муниципаль берәмлекләрендәге хезмәт иминлеген саклау мәсьәләләре белән шөгыльләнүче Координация советлары эшчәнлегенә нык әһәмият бирде.
- Дәүләт хезмәт инспекторлары быел 466 предприятиедә һәм оешмада хезмәт турындагы законнарның үтәлешен тикшерде. Хезмәт иминлеге тәэмин ителмәгән өчен, 857 җитәкче административ штрафка тартылды, ә өч кешегә җинаять эше кузгатылды. Алар ике һәм өч ел срокка ирекләреннән мәхрүм ителделәр. Коллективта кеше саны 50дән артса, анда хезмәт иминлеге өчен җаваплы штат булырга тиеш, - дип кисәтте Эльмира Зарипова.

Татарстанда хезмәт шартларын һәм хезмәт иминлеген яхшырту буенча 2020 елга кадәрге чорга исәпләнелгән программа гамәлгә ашырыла. Узган ел эре предприятиеләрдән 45 мең җитәкче һәм белгеч, кече һәм урта предприятиеләрдән, шулай ук мәгариф, сәламәтлек саклау, мәдәният тармакларыннан 4404 хезмәткәр хезмәт иминлеген саклау буенча махсус курслар узган. Укыту-өйрәтү эшләре дәвам итә.

- Эш урынында иминлек мәсьәләсендә шәхси җаваплылык та зарур. Киң балаклы ыштан, төймәләре каптырылмаган халат киеп, станокта эшләргә ярамый инде, әлбәттә. корыган агачларны унбиш ел кисү белән шөгыльләнгән тәҗрибәле эшчене корыган агач ботагы төшеп үтерде. Агач кискәндә, ботаклар астында басып торырга кирәкми бит инде, - дип уфтанып та алды министр Эльмира Зарипова.