Казан янында автобус катнашындагы юл һәлакәтендә биш кеше зыян күргән (+фото)

Авария 18 октябрь иртәсендә Яшел Үзән – Казан трассасында Үрнәк бистәсе каршында булды, дип хәбәр итә республика Дәүләт автоинспекциясе. Башлангыч мәгълүматларга караганда, пассажир автобусы алдыннан баручы автомобиль җәяүлене үткәреп җибәрү өчен кинәт кенә туктап кала. Автобус йөртүчесе җиңел машинага бәрелүдән саклану өчен рульне уңга борган һәм җәяүлеләр өчен куелган җир өсте кичүенең металл конструкциясенә килеп бәрелгән. "Юл-транспорт һәлакәте вакытында автобус салонында 35 пассажир булган. Аларның бишесе җәрәхәтләр алган", - дип аңлаттылар ЮХИДИдә.

Әлеге факт буенча Татарстанның тикшерү органнары тарафыннан куркынычсызлык таләпләренә җавап бирми торган хезмәт күрсәтү маддәсе буенча җинаять эше кузгатылган.
Җинаять эшен тикшерү дәвам итә.