Казан үзәгендә сугышкан биш егет тоткарланган

Казан үзәгендә бәрелештә катнашкан биш кешене тоткарлаганнар. Бу хакта Россия Эчке эшләр министрлыгының Казан буенча идарәсе матбугат хезмәтендә хәбәр иттеләр.
Бу ялларда Казанда Бауман урамында төшерелгән ызгышның видеосы социаль челтәрләрдән кулланучыларда каршылыклы  фикерләр уяткан, берәүләр 90нчы еллар кайтты, дисә, икенчеләре, исләре китмичә, гадәти хәл дип кенә шәрех калдырганнар. Әлеге ызгыш узган шимбәдә кичке сәгать унбердә төшерелгән икән. Бәрелешнең шаһитләре  полиция нарядын чакырткан. Урынга килеп җиткән хокук сакчылары биредә 5 кешене тоткарлаган.
Шаһитлар сүзләренчә, яшьләр тиз туклану ресторанына чиратта торганда, нидер бүлешә алмаганнар. Ресторан хезмәткәре кызмача егетләрне тынычландырырга тырышып караган, ләкин әтәчләнгән яшьләрне бу гына туктатмаган, һәм алар арырак Милли банк бинасы янына киткәннәр, анда ызгыш дәвам иткән.
Полиция бүлегендә исә, егетләр бер-беребезгә дәгъваларыбыз юк, дип белдергәннәр. Низагта зыян күрүчеләр ачыкланмаган. Җәмәгать тәртибен бозучыларны административ җаваплылыкка тарту мәсьәләсе хәл ителә.

Фото: видеодан скриншот.