Казан үзәгендә хәләл клиника төзелә

Хәләл стандартлары буенча эшләүче медицина учреждениеләре Россия белән Татарстан өчен яңа юнәлеш булса да, әлеге төр хезмәткә ихтыяҗ елдан-ел арта бара. Татарстанның «Вакыф фонды» генераль директоры Рөстәм Хәбибуллин сүзләренчә, фонд, Татарстанның Сәламәтлек саклау министрлыгы белән берлектә, ислам кануннары буенча сертификацияләнгән медицина хезмәтләре күрсәтү өчен махсуслашкан бизнес-үзәк концепциясен эшләгән. Әлеге үзәк «Госмания» дип аталачак.

- Клиентларга җайлы булсын өчен, үзәк «бердәм тәрәзә» принцибы буенча эшләячәк. Ул үз эченә амбулатор дәвалау, гомум терапия, педиатрия, вакцинация программасы, лаборатория, косметология кебек юнәлешләрне ала. Биредә ирләрне һәм хатын-кызларны аерым-аерым кабул итәчәкләр. Балалар өчен дә бүлек булдырылачак. Авыруларны озата килүчеләр өчен хостел һәм ашханә булдыру идеясе дә бар, - дип сөйләде безгә Рөстәм Хәбибуллин.

5000 квадрат метр мәйданлы «Госмания» клиникасы Казан үзәгендә - Габдулла Тукай урамында урнашачак. Ул 2017 елда төзелә башлый. Үзәк дүрт катлы булыр дип ниятләнелә. Проектның гомуми бәясе - 6,7 миллион доллар.

«Вакыф фонды» тагын бер проектка алынырга булган. Ул - балалар өчен халыкара тернәкләндерү үзәге. Әлеге үзәк шифаханә тибындагы заманча медицина комплексы булыр дип көтелә. Проектның бәясе - 15 миллион доллар, ди Рөстәм Хәбибуллин.