#Кыскача яңалыклар 12 август 2019, 14:30

Казанда 20 мең урынлык су аренасы төзеләчәк

12 август 2019, 14:30

Казанда зур су аренасы төзергә ниятлиләр. Шулай итеп, Су спорты төрләре буенча 2015 елда Казанда узган Дөнья чемпионатында йөзү һәм синхрон йөзү ярышлары «Казан Арена» стадионында үткәрелгән булса, 2025 елгы Чемпионатның үз «өе» пәйда булырга мөмкин.

Скопировать ссылку

20 мең кешегә исәпләнгән спорт корылмасы Чемпионатка кадәр сафка бастырылыр, мөгаен. Бу хакта «Республика Татарстан»га «Спорт һәм социаль проектлар дирекциясе» оешмасы җитәкчесе Азат Кадыйров җиткергән.

– 2025 елгы Дөнья чемпионатына әзерлек барышында яңа арена төзү турында да уйланабыз, – дигән Кадыйров. – Казанда шундый зур объект барлыкка килсә, башкала мавыктыргыч проектларны тормышка ашыру мәсьәләсендә нык алга китәр иде. 20 меңлек арена, минем уйлавымча, ФИНА (Халыкара йөзү федерациясе. – Ред.) таләпләрен үтәргә дә, тамашачылар өчен уңайлы шартлар тудырырга да ярдәм итәчәк. Андый объектның кулланылышта булачагына ышанычым зур.
Исегезгә төшерәбез, ун ел вакыт узгач – 2025 елда Казан кабат Су спорты төрләре буенча Дөнья чемпионатын үзендә уздыру хокукын яулады.