Казанда 5 яшьлек бала үзе генә автобуста йөргән. Кем икәне һаман ачыкланмаган

Татарстанның автотранспорт предприятиесенең социаль челтәрдәге сәхифәсендә Казанның 60 нчы мартшрут автобусына биш яшьләр тирәсендәге баланың берүзе кереп утыруын һәм аның үз исемен дә белмәвен хәбәр итәләр. Сумка тоткан бала автобуска Авиатөзелеш районындагы бер тукталышта кереп утырган.

Автотранспорт предприятиесе ассоциациясе рәисе Сергей Темляков әйтүенчә, кыз бала кондукторга исемен дә, кая баруын да, әти-әнисенең телефон номерын да, ни өчен ялгызы булуын да әйтә алмаган. Автобус экипажы бу хакта диспетчерга хәбәр итә. Шуннан бала полиция хезмәткәрләренә тапшырыла. Хәзер алар баланың кем булуын ачыклый. Ассоциация автобус камерасындагы видеоны да урнаштырган. Бәлки баланы танучы булыр.