Казаннан «Салават күпере»нә поезд йөри башлый

- Узган ел ахырында без Горький тимер юлы җитәкчелеге белән килешү төзедек. Шуның нигезендә, «Салават күпере» микрорайонына тимер юл тармагы төзергә уйладык. Тимер юл микрорайонны «Казан-2» станция­се белән тоташтырачак, - диде транспорт һәм юл хуҗалыгы министры Ленар Сафин.

Аның сүзләренчә, «Казан-2» вокзалы - метроны да, тимер юл һәм җир өсте транспортын да берләштерә торган урын. Министр киләчәктә Казан тирәли барлык шәһәр яны бистәләрен үз эченә алган тимер юл боҗрасы барлыкка килү ихтималын да җиткерде. Соңгы вакытта шәһәр яны электричкалары халык арасында популярлаша бара, маршрутлар да арта икән. «Содружество» компаниясе, әйтик, 2016 елда 700 миллион керем алган. Тагын бер яңалык: тест рәвешендә пассажирлар агымы мониторингының автоматлаштырылган системасы эшли башлаган. Ул билетсыз йөрүче пассажирларны киметергә булышачак. Шуны да искәртергә кирәк: Татарстанда тимер юл транспортына бәяләр Идел буе округында чагыштырмача түбән. 9 чакрымлы зона өчен ул 13,7 сумны тәшкил итә.