Казанның 42нче мәктәбенә Украинада һәлак булган Россия Герое Дамир Гыйлемханов исеме бирелде

Дамир Гыйлемханов Казанда 1999 елда туган, 42 нче мәктәптә 9нчы сыйныфны тәмамлап көллияткә укырга кергән, биредә «сантехник җайланмаларны монтажлау һәм эксплуатацияләү,  вентиляция» белгечлеге буенча белем алган. 2019 елда Дамирны хәрби хезмәткә алалар. Соңрак егет килешү төзеп контракт буенча хезмәт итәргә кала. 

Ефрейтор Дамир Гыйлемханов Т-72Б1 танкы белән идарә итә. Җиденче мартта Татарстан егете Россия хәрбиләре төркеме составында Золотое шәһәре янындагы штурмда катнаша. Башта Дамирның танкы озак вакыт дәвамында алып барган һөҗүмгә каршы тора алган, әмма соңрак аның хәрби машинасын «Молотов коктейле» белән яндыралар. Экипаж ялкынны сүндерә ала. Украина ягыннан катнашучы биш танкның һөҗүменә каршы тора. Дамир аларның дүртесен юк итә, әмма, ни кызганыч, көчләр тигез булмаган сугышта Татарстан егете батырларча һәлак була.

Россия Президенты Указы белән Дамир Гыйлемханов үлгәннән соң Россия Герое исеменә лаек булды. Аны 15 апрельдә Казан янындагы Мамадыш трактындагы "Курган" зиратында җирләделәр.