KazanScienceWek атналыгы фәнгә игътибарны җәлеп итте

Аның кысаларында өч зур чара - Е.К. Завойский исемендәге Халыкара премия тапшырылды, «Магнит резонансының заманча үсеше» һәм «Спиновая физика, спиновая химия һәм спиновая технология» халыкара конференцияләре узды. Россиянең төрле төбәкләреннән һәм чит илләрдән җыелган галимнәр фән үсеше, фәннең төрле тармакларда кулланылышы турында фикер алышты.

Россия фәннәр академиясенең Казан фән үзәге директоры Алексей Калачев сүзләренчә, мондый зур конференцияләрнең бер атналыкка берләштерелеп үткәрелүе фәнгә игътибарны җәлеп итәргә, халыкара элемтәләрне үстерергә мөмкинлек бирә. 

-    Бу чараларның дәрәҗәсе бик югары. Татарстан хакимияте безгә һәрчак теләктәшлек күрсәтә. Завойский премиясен тапшыру да, ике зур конференцияне үткәрү дә алар ярдәме белән башкарылды, - ди Россия фәннәр академиясенең Казан фән үзәге директоры.

Татарстанда фәнни эшчәнлекне стимуллаштыру өчен төрле ярдәм чаралары күрелә, шул исәптән грантлар һәм стипендияләр, фәнни премияләр гамәлгә кертелә, конкурслар уздырыла һәм корпоратив программалар эшләнә. Шулай да фәндә яшьләр дефициты күзәтелә, бу бик җитди проблема булуы билгеләнде.

-    Безнең фән үзәгендә галимнәрнең 50 процент тирәсе 39 яшькә кадәрге яшьләр тәшкил итә. Әмма шулай да фәнгә яшьләрне җәлеп итү җитди проблема. Ярый әле Татарстанда яшьләргә ярдәм итүнең уникаль инструменты бар. Бу – “Алгарыш” программасы. Ул яшь галимнәргә республика хисабына Россиянең һәм чит илнең алдынгы фәнни үзәкләрендә стажировка үтәргә, тәҗрибә тупларга мөмкинлек бирә. Башка төбәкләрдә мондый программалар юк. Шул рәвешле без фәнгә яшьләрне җәлеп итә алабыз, - диде Алексей Калачев.