«Хрущевка»ларга көн бетә?!

Бу турыда Татарстан Президенты Рөстәм Миңнеханов тарихи җирлекләрдә шәһәр төзелеше мәсьәләләре буенча ведомствоара комиссиянең чираттагы утырышында әйтте, дип хәбәр итә Татарстан Президенты матбугат хезмәте.
– 15-20 елдан соң нәрсә күрергә теләвебезне исәпләп эш итәргә кирәк. Мөгаен, Казан да Мәскәүдәге кебек иске “хрущевкаларны” сүтәргә керешер, – дигән Рөстәм Миңнеханов.
Утырышта Кабан күле буе территориясен үстерү турында Олег Маклаков сөйләгән. Татарстан Президенты төзелеш концепциясе күл тирәсендәге территория Казанда җәлеп итә торган урыннарның берсе булачагын исәпкә алырга тиешлеген белдергән.
– Безгә башкаланың тарихи төсен саклау мөмкинлеге бирә торган концепция кирәк, – дигән Миңнеханов һәм игътибарны җир участоклары хуҗаларына күл буе корылмаларының үзенчәлекләре турында мәгълүмат бирергә кирәклегенә юнәлткән.
Аның сүзләренчә, биредә тарихи җирлек чикләре өчен кагыйдәләр үтәлергә, шәһәрнең тарихи йөзе сакланырга тиеш.
Утырыш нәтиҗәләре буенча Кабан күле тирәсендәге төзелеш концепциясен, техник биремнәрне исәпкә алып, эшләп бетерергә карар чыгарганнар. Бу эшкә Казанның профессиональ архитектура бергәлеге җәлеп ителәчәк.
Исегезгә төшерәбез, 2017 елның февралендә Россия Президенты Владимир Путин Мәскәү мэры Сергей Собянинга башкаладагы биш катлы йортларны сүтәргә һәм алар урынына яңа йортлар төзергә кушты. Соңрак Дәүләт Думасы Мәскәүдә торакларны реновацияләү турындагы закон проектын хуплады.