Китап суны чистарта

Америка галимнәре суны чистарту сәләтенә ия булган китап уйлап тапкан. Аларның сүзләренчә, "эчә торган китап"ның көмеш һәм бакыр кисәкчекләреннән ясалган битләрен суны чистарта торган фильтр урынына кулланып була. Шул ук вакытта китапка суны ни өчен чистартырга кирәклеге турында мәгълүмат та язылып бара ди. Укыган бер битне ертып алып, фильтр өчен эшләнгән җайланмага урнаштырасың да өстенә су агызасың. Нәтиҗәдә бактерияләрдән арындырылган чиста су белән тәмләп чәй эчәсең. Китапның бер бите 100 литр суны чистартырга сәләтле икән. Димәк, бер китап якынча дүрт елга җитәргә мөмкин.