#Кыскача яңалыклар 12 апрель 2022, 14:59

Коррупция хакында аноним хәбәр итәргә буламы?

12 апрель 2022, 14:59

Коррупция очракларын ачыклаган очракта, кая һәм кемгә мөрәҗәгать итәргә була? Анононим хәбәрләр буенча тикшерүләр уздырыламы? Коррупция очракларына багышланган матбугат очрашуында белгечләргә шундый сорау бирелде.

Скопировать ссылку

“Мәгариф өлкәсендә коррупция очраклары ачыклана икән, ул чагында Мәгариф өлкәсендә күзәтчелек һәм контроль департаментына мөрәҗәгать итәргә мөмкин”, - диде Татарстан мәгариф һәм фән министры урынбасары Рәмис Мөҗипов.

Башка өлкәләрдә коррупция очраклары ачыкланса, шул исәптән, мәгариф өлкәсендә дә, “Халык контроле” сервисы аша мөрәҗәгать юлларга була. Андагы мөрәҗәгатьләр Татарстан Президентының Коррупциягә каршы көрәш мәсьәләләре идарәсе, Эчке эшләр министрлыгы тарафыннан мониторлана.

Аноним мөрәҗәгатьләр караламы дигәндә, әлбәттә, андый очраклар да тикшерелә, дип белдерде Татарстан Президентының Коррупциягә каршы көрәш мәсьәләләре идарәсе вәкиле Салават Рәхимов.

“Мөрәҗәгать аноним булганда, аңа җавап биреп кенә булмый. Тик алар тикшерелә. Безгә килгән күп кенә аноним мөрәҗәгатьләр расланды. Безне гаҗәпләндергән әйберләр дә бар. Бер муниципаль районнан килгән хәбәрдә вазыйфаи затның җир кишәрлекләрен “уңга-сулга” таратуы хакында язылган иде. Аноним мөрәҗәгать юллаган кеше кишәрлекләрнең хәтта кадастр номерларына кадәр күрсәткән! Бу хәбәр дә расланды”, - диде Салават Рәхимов.

Кызыклы яңалыкларны күзәтеп бару өчен безнең МАХ каналына кушылыгыз.

#коррупция, аноним хәбәр, Рәмис Мөҗипов, Салават Рәхимов