Мәгариф һәм фән министрлыгы ялган дипломнар белән көрәш башлаган

Татарстан мәгариф һәм фән министры урынбасары Рәмис Мөҗипов сүзләренчә, сайтларның чыннан да эшлиме-юкмы икәнен тикшерү өчен министрлык дипломнарга заказ биреп тә караган һәм сайтларның актив булуына инанган.

Хәзер бу сайтларны ябу буенча эш алып барыла. Инде 9 сайтның эшчәнлеге туктатылган. Тик озаккамы икән? Рәмис әфәнде үзе дә моңа шик белдерде.

“Алар аҗдаһа башы сыман: берсен киссәң, тагын өчесе үсеп чыга. Берсен ябуга, икенчесен ачалар”, - ди урынбасар.

Мәгариф һәм фән министрлыгы төрле социаль челтәрләрдә сораштыру да үткәргән. Аның нәтиҗәләре буенча, диплом эшләрен респондентларның 62 проценты гына үзләре язуы ачыкланган. Җавап бирүчеләрнең 6 проценты үзем, әмма акчага язучыны белсәм, акча гына түләр идем, дигән. 15 процент очракта диплом эшен сатып алганнар һәм бар да яхшы узган. Ә менә 4 процент респондент акча түләп тә, фәнни эшне үзенә яңадан эшләргә туры килгән. Сораштыруларда катнашучыларның 13 проценты диплом эше белән бөтенләй дә шөгыльләнмәгән. Әлеге мәгълүматлардан соң дипломнарны тикшерү тагын да көчәйгән.