Мобилизацияләнгән казанлыларның балаларына лагерьләргә бушлай юлламалар бирелә

Профильле смена 30 нчы октябрьдән 5 нче ноябрьгә кадәр узачак. Бу хакта ТР башкаласы мэриясенең матбугат хезмәте хәбәр итә.

Казанның мобилизацияләнгән кешеләренең балалары «Восток» балалар савыктыру лагерена бушлай юлламалар ала ала. 7-17 яшьлек балалар өчен профиль смена көзге каникуллар вакытында 30 нчы октябрьдән 5 нче ноябрьгә кадәр узачак.
Балалар өчен сәламәтләндерү һәм спорт чаралары, иҗади конкурслар, квизлар һәм квестлар әзерләнде. Программа «Без» берлеге» креатив фестивале белән тәмамланачак, анда отрядлар бер команда булачак һәм бер-берсенә ярдәм итәчәк.

Профильле сменага гариза «Ял» шәһәр үзәге сайтында урнаштырылган. Шулай ук 25 нче Октябрь ур., 13/6 адресы һәм +7(843)590-24-82, +7(843)297-36-02 телефоннары буенча да мөрәҗәгать итәргә мөмкин.

Юллама алу өчен түбәндәге документлар кирәк: баланың туу турындагы таныклыгы яки паспорты, шулай ук аның СНИЛС документы, гариза тапшыручы ата-ананың паспорты, Казан территориясендә баланы теркәү турында мәгълүматлар, ата-ананың берсен мобилизацияләү турында хәрби комиссариаттан белешмә, дип хәбәр иттеләр шәһәрнең «Ял» үзәгендә.

Исегезгә төшерәбез, октябрь башында Казан Мэры Илсур Метшин өлешчә мобилизацияләүгә бәйле социаль-гуманитар мәсьәләләр буенча штаб утырышын уздырды. Ташламалар исемлегенә мәктәпләрдә бушлай ике тапкыр кайнар ризык белән тәэмин итү, җәмәгать транспортында түләүсез йөрү һәм башкалар керә. Бу ярдәм чараларыннан ничек файдаланырга һәм кая мөрәҗәгать итәргә кирәклеге турында KZN.RU порталының махсус бүлегендә укыгыз.

Мобилизацияләнгән гражданнарның гаиләләренә ярдәм итүнең өстәмә чараларын да Татарстан хөкүмәте раслады. Мәсәлән, 7 яшьтән алып 17 яшькә кадәрге балалары булган гаиләләр ялны оештыруга юлламалар белән беренчел чиратта тәэмин ителүгә ия.

Билгеле булганча, Россия Оборона министры Сергей Шойгу РФ Президенты Владимир Путин белән очрашу барышында илдә өлешчә мобилизацияләү буенча чараларның тәмамлануы турында хәбәр итте.