Мәскәү артыннан Санкт-Петербург та чикләүләр кертте...

Санкт-Петербург губернаторы Александр Беглов Төньяк башкалада карантин чараларын катгыйландыру турындагы карарны имзалады. Мондый карар бөтен ил буенча авыручылар саны арту сәбәпле кабул ителде. Бу хакта мәгълүмат шәһәр администрациясе сайтында чыкты.

17 июньнән шәһәр сәүдә үзәкләрендә кибетләр территориясендә фуд-кортлар, балалар бүлмәләре һәм башка күңел ачу объектлары эшен вакытлыча туктатып торалар.

Җәмәгать туклануы оешмалары 2:00–6:00 сәгатьләрдә генә эшләячәк, әмма ризыкны бары тик чыгарып кына бирәчәк. Кинотеатр залларын тамашачылар белән тутыру 75 проценттан 50 процентка кимиячәк.

Күмәк чараларда катнашучылар саны 3 мең кешедән артмаска тиеш. Шуңа бәйле рәвештә гомуми белем бирү мәктәпләренең иң яхшы чыгарылыш укучылары өчен «Медалистлар баллы» киңкүләмле бәйрәме булмаячак.

Шулай ук 14 июньнән футбол буенча Европа чемпионаты фан-зоналары җанатарлары битлек кияргә, санитар нормаларын үтәргә тиеш.

Соңгы тәүлектә Россиядә 14 723 кешедә коронавиурс ачыкланган. Илдә барлыгы 5 208 687 чир йоктыру очрагы теркәлгән.

Искәртәбез, Россия Президенты Владимир Путин коронавируска каршы вакцина кадату мәҗбүри куелмаячак, дип белдергән иде.

Чыганак: Татар-информ