Музейга билетны интернет аша сатып алырга мөмкин

Хәзер теләгән кешенең билетны http://tickets.kazan-kremlin.ru/ адресы аша музейның электрон кассасы аша да алу мөмкинлеге бар, дип хәбәр итә «Татар-информ» агентлыгы.
Казан Кремле музей-тыюлыгының матбугат үзәге хезмәткәрләре әйтүенчә, бу музейда бара торган күргәзмәләрне сайлаганда, мәдәни чарага барасы көнеңне алдан планлаштырганда булыша. Әлеге яңа хезмәт ярдәмендә «Эрмитаж-Казан» үзәгенә, Ислам мәдәнияте музеена, Татарстан дәүләте тарихы музеена, башка күп кенә музейларга, «Казан Кремле» музей-тыюлыгы оештырган мәдәни-күңел ачу чараларына, яңа ел кичәләренә барырга мөмкин. Интернет аша түләнгән электрон ваучерны музейга керер алдыннан, кассада кәгазь билетка алыштыру мөһим.