Президент «КАМАЗ-мастер» командасына уңышлар теләде

Республика башлыгы ике спорт автомобилендә икешәр әйләнеш ясап, йөк машиналарының техник характеристикасын югары бәяләде, дип хәбәр итә «Татар-информ» мәгълүмат агентлыгы.

Рөстәм Миңнеханов:
– «КАМАЗ-мастер» командасын «Дакар»га озату матур гадәткә керде. Монда без алда булган ярышларда йөк машиналары дучар булган техник үзгәрешләрне бәялибез. Без бүген тагын бер тапкыр бер урында тормавыбызга инандык, – диде Президент. – Яңа автомобильләрдә принципиаль яңа эшләнмәләр күп. Барысы да башка — двигатель, подвеска, автомат тапшыру коробкасы. Шуның өчен конструктор, технолог, инженерларга – команданың техник составына рәхмәт белдерәм. Без камазлыларның илебезне, республикабызны лаеклы күрсәтәчәкләренә ышанабыз. Яхшыга өметләнәбез һәм җиңү өчен көрәшәбез!

25 ноябрьдә «КАМАЗ-мастер» машиналары, Атлантиканы кичү өчен, паромга керәчәк. 6 гыйнварда Перу башкаласы Лимадан ярышлар башланып китәчәк. Узышчыларга 5 мең километр дистанцияне үтү бурычы тора. Финиш ун этаптан соң шулай ук Лимада булачак.
Быел «КАМАЗ-мастер» командасы ярышка өр-яңа дүрт спорт йөк машинасын куя. Алар алдагы буын машиналардан заманча дизайн белән дә аерылып тора. Машиналар «КАМАЗ-мастер»ның 30 еллык юбилеена багышлап эшләнгән.

Фото: tatarstan.ru