Программистлар Галимҗан Барудига багышланган контроль эше үткәрә

Узган ел студентлар шундый ук чараны Габдулла Тукайның 130 еллыгына багышлап үткәргән иде. Анда бөтендөнья буйлап 10 мең кеше катнашты. Быелгы биремнәр дә үзенчәлекле.
- Узган елны контроль эше чит илләрдә яшәүче татарлар арасында да зур кызыксыну уяткан иде. Япониядән Мизуки, Юто исемле кыз белән егет катнашты. Алар әле дөньякүләм татар теле олимпиадасы җиңүчеләре дә. Быел да проектта бик теләп катнашачаклар. АКШ, Европаның төрле илләренә күчеп киткән татарлар да контроль эшкә битараф калмады. Казахстан, Кыргызстан, Үзбәкистаннан да катнашучылар бар иде, - ди онлайн контроль эше оештыручыларының берсе Азат Кашапов.

Контроль эше ике этаптан тора. Беренче тестта татар телен белү дәрәҗәсе сынала. Икенчесендә - Галимҗан Баруди шәхесенә кагылышлы сораулар булачак. Аларга бер сәгать эчендә җавап бирергә кирәк. Ике этапны да уңышлы узган кешеләргә гаҗәп кызыклы фактлар белән тулыландырылган "Галимҗан Баруди тормыш картасы" тапшырыла.

- Быелгы биремнәр катлаулырак булачак. Тукай тормышын һәм иҗатын күп кеше белә, ә менә Галимҗан Баруди турында, кызганыч, белүчеләр азрак. Тестны уңышлы үтү өчен Баруди тормыш юлын яхшы белергә кирәк. Татар теле кагыйдәләре, төрле әйтемнәре, мәкаләләре турында да сораулар күп була. Контроль эшенә кадәр алдан "танышу тестын" үтеп белеп була. Tattest.ru дигән рәсми сайтыбыз инде ачык, - ди Азат.

Онлайн контроль эшендә катнашу өчен шул сайтта алдан ук теркәлергә кирәк. Аның нәтиҗәсендә һәр катнашучыга онлайн сертификат бирелә.

Контроль эше 26 май көнне төнге уникедә башланып, 27 май төнге уникедә тәмамлана. Әлеге вакыт башка сәгать поясында урнашкан чит ил катнашучылары өчен дә уңайлы булсын дип сайланган.