#Кыскача яңалыклар 21 апрель 2022, 15:06

Ркаил Зәйдулла мәктәпләрдә Россия флагыннан соң Татарстанныкын күтәрергә тәкъдим итте

21 апрель 2022, 15:06

Россия мәгариф министры Сергей Кравцов мәктәпләрдә Россия гимнын уйнатырга һәм ил байрагын күтәрергә дигән тәкъдим белән чыкты. Аңа җавап итеп, Дәүләт Советы депутаты Ркаил Зәйдулла Россия гимны белән байрагыннан соң, Татарстанныкын да күтәрергә кирәк дигән фикерен җиткерде.

Скопировать ссылку

“Соңгы арада патриотик тәрбия темасы күтәрелеп китте. Һәркем моңа үз өлешен кертергә тырыша. Россия мәгариф министры Сергей Кравцов күрсәтмәсе буенча, һәр мәктәптә Россия гимны яңгырап, Россия флагы күтәреләчәк. Патриотик тәрбиянең туктап торганы юк инде. Патриотик тәрбия кирәк, ләкин анда милли республика гимны яңгырап, республика байрагы күтәрелергә тиеш дигән сүз юк”, - ди Ркаил әфәнде.

Депутат Башкортстандагы хезмәттәшләре белән элемтәгә кергән.

“Алар Россия гимныннан соң, Башкортстан флагын күтәреп, Башкортстан гимны уйнаячак, диделәр. Безгә дә шул рәвешле гамәл кылырга кирәк дип уйлыйм”, - дип белдерде депутат.

Дәүләт Советы Рәисе бу тәкъдимне хуплады һәм Думада Татарстаннан булган депутатлар белән очрашып, әлеге мәсьәлә буенча фикер алышырга вәгъдә бирде.

Кызыклы яңалыкларны күзәтеп бару өчен безнең МАХ каналына кушылыгыз.