Россия көнендә Казан Кремлендә “Созвездие-Йолдызлык” лауреатлары чыгыш ясаячак

Татарстан башкаласы халкы һәм кунаклары өчен 350-дән артык яшь артист чыгыш ясаячак, алар үзләренең иң яхшы номерларын күрсәтәчәк.

Концерт “Азаль” халык вокаль ансамбле һәм “Татарстан” бию ансамбле чыгышлары белән ачыла, соңрак тамашачыларны “Фристайл” студиясе, “Паприка” ансамбле, “Кама йолдызчыклары” коллективы, “Версия” дуэты, “Шарм”, “Дорога из города”, “Орфей”, “Ал чәчәк”, “Изумрудный город” бию коллективлары һәм башкалар сөендерәчәк.

“Созвездие-Йолдызлык” лауреатлары һәм җиңүчеләре өч сәгать дәвамында тамашачылар өчен дәртле эстрада номерлары һәм композицияләр башкарачак. Чара фестиваль гимны – “Кояш дискотекасы” җыры белән тәмамлана.

Исегезгә төшерәбез, “Созвездие-Йолдызлык” зур фестиваль хәрәкәте ел саен Татарстан Президенты патронажы астында һәм ЮНЕСКО эшләре буенча Россия Комиссиясе эгидасы астында уза. Быел ул Туган телләр һәм халыклар бердәмлеге елына багышланган.

Концерт 14:00 сәгатьтә башлана.