"Рубин"ның яңа президенты итеп Илсур Метшин сайланды

Бүген Татарстан лидеры Рөстәм Миңнеханов рәислегендә "Рубин" футбол клубының Попечительләр советы утырышы узды. Анда "Рубин" ФК президенты Валерий Сорокинның отставкасы кабул ителде.

Попечительләр советы Валерий Сорокинга "Рубин" ФК президенты вазифасында финанс дисциплинасын һәм финанс агымнарының ачыклылыгын арттыру өлкәсендә башкарган җитди эше өчен рәхмәт белдерде.
Валерий Сорокин тәкъдиме буенча, "Рубин" ФК яңа президенты итеп бертавыштан Илсур Метшин сайланды.

Попечительләр советы "Рубин" ФК яңа президентына "Рубин" футбол клубының баш тренеры Ринат Биләлетдинов белән контрактны өзәргә йөкләде, дип хәбәр итә ТР Президенты матбугат хезмәте.