Севастопольдә "Созвездие-Йолдызлык" лауреатлары махсус хәрби операция катнашучылары алдында чыгыш ясады 

Флот офицерлары йорты сәхнәсендә Татарстанның 23 муниципаль берәмлегеннән 210 яшь артист чыгыш ясады. Хореография һәм вокал номерлары аша алар бәйрәм кунакларын Татарстанның күпмилләтле мәдәнияте белән таныштырды, совет һәм Россия композиторларының әсәрләрен башкарды. Концерт тамашачылары арасында хәрби диңгез флоты офицерлары һәм матрослар - махсус хәрби операциядә катнашучылар, аларның гаилә әгъзалары һәм флот ветераннары бар иде . 

Концерт Россия Кара диңгез флотының һәм Татарстан Республикасының күпьеллык хезмәттәшлеге, шулай ук бу көннәрдә Кырымда узучы фестивальнең традицион җәйге иҗади сменасы кысаларында үтте. Татарстан башлыгы Рөстәм Миңнеханов адресына тиешле чакыру хатын элегрәк Россиянең Кара диңгез флоты җитәкчесе, адмирал Виктор Соколов җибәргән иде. Ул шулай ук республика җитәкчелегенә «күпьеллык һәм нәтиҗәле хезмәттәшлек, кара диңгезчеләрнең әхлакый рухына ярдәм иткәне өчен» рәхмәт белдерде. 

Россия Кара диңгез флоты җитәкчесе исеменнән концертта катнашучыларга һәм оештыручыларга сәхнәдән Севастополь Флот офицерлары йорты башлыгы, 1 ранг капитаны Владимир Пискайкин рәхмәт белдерде. 

"Бүген без Россия Хәрби-Диңгез флоты көненә һәм Кара диңгез флоты төзелүнең 240 еллыгына багышланган концертта җыелдык. Флот һәм фестивальнең 20 елга якын дуслыгы дәверендә сез безгә шулкадәр якынлаштыгыз, без сезне кунакларыбыз дип тә атый алмыйбыз инде. Зинһар, Севастопольне икенче йортыгыз дип санагыз. Монда сезгә барысы да һәрвакыт шат һәм сезне бик ярата", - дип билгеләп үтте Пискайкин. Моңа өстәп, ул концерт оештыручыларына һәм катнашучыларына «нацизм һәм фашизмга каршы көрәштә Кара диңгез флотына һәм диңгезчеләренә ярдәм иткәне, Россия сугышчыларының батырлыкларын пропагандалау буенча уңышлы хезмәт өчен» дигән билгеләмә белән грамоталар тапшырды. 

Фестиваль жюри рәисе, Казан консерваториясе профессоры, РФ халык артисты Зилә Сөнгатуллина концертның аерым патриотик рухын һәм аның зур тәрбия әһәмиятен билгеләп үтте. "Безнең фестиваль балаларында туган илгә мәхәббәт яшьтән үк барлыкка килә. Алар бу хакта үз номерларында җырлый, сөйли, бии, яшьтәшләренә, тамашачыларга хәбәр итә. Шуңа күрә аларны махсус патриотизмга өйрәтүдә кирәк юк: ул аларның канына сеңгән, алар инде шулай тәрбияләнгән. Һәм бу импульсны алар алга таба да башкаларга тапшырачак", - дип уртаклашты Сөнгатуллина. 

Кырымда һәм Севастопольдә «Созвездие-Йолдызлык» фестивале лауреатлары һәм җиңүчеләре өчен традицион җәйге иҗади смена 17 июльдән 8 августка кадәр Татарстан Республикасы Рәисе Рөстәм Миңнеханов һәм ТР Яшьләр эшләре министрлыгы ярдәме белән уза. Балалар танылган мәдәният эшлеклеләреннән мастер-классларда катнаша, истәлекле урыннарга йөри һәм концертларда чыгыш ясый. 

«Созвездие-Йолдызлык» фестиваль хәрәкәтенең матбугат хезмәте