#Кыскача яңалыклар 13 октября 2022, 10:11

Солдатларга хәләл ризык җибәрү өчен 2 млн сумнан артык акча җыелган

13 октября 2022, 10:11

Нәзарәттә мөфти Камил хәзрәт Сәмигуллин Казан шәһәренең Киров һәм Мәскәү районы имам-мөхтәсибе, «Ярдәм» мәчете имам-хатыйбы Илдар хәзрәт Баязитов белән күреште.

Скопировать ссылку

Очрашу сәбәбе булып Татарстаннан чакырылган солдатларга махсус хәрби операция кырларына хәләл ризык җибәрү өчен мөхтәсибәт һәм «Ярдәм» фонды җыйган акчаны тапшыру торды.

Илдар хәзрәт мөфтигә Нәзарәт тарафыннан игълан ителгән акциянең беренче көненнән үк «Ярдәм» фонды һәм Киров-Мәскәү районы мөхтәсибәтенең әлеге изге эшкә кушылулары турында белдерде. Нәтиҗәдә, кыска вакыт эчендә «Ярдәм» фонды – 150 000 сум, мөхтәсибәт мәчетләреннән 75 000 сум күләмендә акча җыелды. Бүген әлеге суммаларны Илдар хәзрәт беренче взнос буларак Нәзарәтнең «Зәкят» фондына тапшырды.

Моннан тыш, Илдар хәзрәт мөфтигә сөйләп узганча, «Ярдәм – Помощь» гомуммилләт хәйрия фонды «Батырлык-Мужество» дигән проект ачып җибәрде. Бу проект кысаларында, өлешчә мобилизацияга эләккән ир-атларның гаиләләренә «Ярдәм – Помощь» фондының ашамлыклар кибетеннән ике меңлек сертификат белән азык-төлек алу мөмкинлеге бирелә. Бүгенге көндә 108 гаилә шундый сертификатлар белән тәэмин ителде. Булышырга теләгән кеше «Ярдәм – Помощь» фондына яки «Ярдәм» мәчетенә мөрәҗәгать итә ала.

Әйтергә кирәк, Нәзарәт игълан иткән акча җыюга Татарстанның күп мөхтәсибәтләре кушылды. Республика имам-мөхтәсибләренең, мәчет имамнарының һәм мәхәлләләрдәге активистларының тырышлыгы белән бүгенге көндә мөфтият реквизитларына 2 584 455 сум күләмендә акча килде.

Чыганак - "Татар-информ"