«Студентлар язы»на күп калмады

- 2015 елда Владивосток шәһәрендә узган «Студентлар язы»нда Татарстан делегациясенең җиңүгә ире­шүе нәтиҗәсендә һәм Президентыбыз Рөстәм Миңнеханов булышлыгы белән, быел чара Казанда уза. Анда барлыгы 250 волонтер катнашачак. Шуларның 50се - башка шәһәрләрдән. Торак мәсьәләсенә килгәндә, студентлар Универсиада авылында яшәя­чәкләр. Бу территория Роспотребнадзор, МЧС хезмәткәрләре, кизү тору­чылар күзәтчелендә булачак. Бәйгенең жюри әгъзалары арасында мәшһүр артистлар, журналистлар, шоу-бизнес вәкилләре - Яна Чурикова, Никита Высоцкий, Борис Кочевников, Николай Скорик, Егор Дружинин һәм башкалар булачак,- диде яшьләр эшләре һәм спорт министры Владимир Леонов матбугат конференциясендә.

- «Студентлар язы» фестивале - иҗади яшьләр тормышындагы иң зур вакыйгаларның берсе. Аның Казан шәһәрендә узуы безнең өчен куанычлы хәл. Казан үзе дә студентлар шәһәре. Татарстанда барлыгы 33 уку йорты бар. Безнең өчен ул зур хөрмәт һәм, әлбәттә, җаваплылык. Читтән килгән өч меңгә якын студент безнең шәһәр белән танышачак, мәркәзебезнең истәлекле урыннарында булачак. Аларның бездән нинди тәэсирләр белән китүе бик мөһим. Әлеге чараны башкарма комитет, студентлар лигасы югары дәрәҗәдә башкарып чыгар дип ышанып калам, - диде Казан башкарма комитеты җитәкчесенең беренче урынбасары Дамир Фәттахов.

Студентлар фестивален оештыру максатында, Татарстан бюджетыннан 30 миллион сум акча бүленеп бирелгән. Быелгы конкурста 75 төбәктән 3000 студент катнашуы үзе үк әлеге чара өчен рекорд булып тора.

- Инде 24нче тапкыр үт­кә­реләчәк «Студентлар язы»нда без байтак тәҗрибә тупладык. Казан - шушы бәйгенең үзәге. Монда бары тик яхшыларның яхшылары гына килә. Тәкъдим ителәсе номерлар да намус белән бәяләнәчәк. Без барыбыз да беләбез, 2017 елда дөньякүләм яшьләр фестиваленең чираттагысы шулай ук безнең илдә узар дип көтелә. Быелгы «Студентлар язы» бер үк вакытта киләсе елга әзерлек булып та тора. Анда һәрбер сәләтле студент катнаша ала, - дип белдерде Россия яшьләр берлеге рәисе Павел Красноруцкий.

«Татарстан Студентлар лигасы» төбәк яшьләр иҗтимагый оешмасы президенты, «Россия студентлар язы - 2016»ның башкарма директоры Элькин Искәндәров булачак чаралар белән дә таныштырып китте. Кунак булып килгән студентларга республика шәһәрләре буенча бушлай сәяхәт итү мөмкинлеге дә булачак икән. Казан Кремленнән Казан университетына кадәр парад булачагын да әйтеп китәргә кирәк. Ә фестивальне ябу тантанасында иң яхшы номерлар күрсәтеләчәк. Җиңүчеләр Россия Президенты премия­сенә лаек булачак.