Талпаннарның активлыгы быел түбәнрәк. Сәбәбе нидә?

Сезон башыннан медицина оешмаларына талпан кадалган 6 457 кеше мөрәҗәгать иткән. Узган елның шул ук аралыгы белән чагыштырганда, бу 9 процентка азрак.

Роспотребнадзорның Татарстан буенча идарәсе җитәкчесе урынбасары Любовь Авдонина хәбәр иткәнчә, кешеләргә кадалган 3 меңнән артык талпан лабораторияләрдә тикшерелгән, аларның 21 процентында бореллиоз тудыру ихтималы ачыкланган. 13 кеше бореллиоз белән зарарланган.  Узган елда бу вакытка инде 22 зарарланучы булган. Әмма быел 5 кешедә вируслы энцефалит ачыкланган, узган елда бер генә дә очрак теркәлмәгән булган.

-    Шушы 5 очракның берсе – җирле. Зарарлану Бөгелмә районы территориясендә булган. Калган  4се башка төбәктә булган чакта татарстанлылар тарафыннан эләктерелгән, - диде Любовь Авдонина. 

Талпаннарга каршы территорияләрне эшкәртү эше тулысынча тәмамланган. Барлыгы мондый чаралар 2917 гектарда башкарылган, бу узган ел белән чагыштырганда 13 процентка күбрәк.