Татарстанда уртача пенсия артты

Былтыр пенсияләрне чираттагы индексацияләүне бер тапкыр бирелә торган 5000 сум белән алыштырдылар. Бүген әлеге түләүләр 100 процент күләмдә диярлек башкарылган. Аны 1 млн 119 мең 441 кеше алган. Ниндидер сәбәпләр аркасында әлеге 5000 сумны гыйнвар аенда алырга өлгермәгәннәргә ул февраль ае пенсиясенә өстәлеп киләчәк. Индексация ясалганнан соң, 1 февральдән Татарстанда уртача пенсия 12400 сумны тәшкил итә ( февральгә кадәр ул 12260 сум иде). Кыскасы, пенсия якынча 140 сумга арткан.

Иминият пенсиясе белән беррәттән федераль ташламага ия категориягә ай саен бирелә торган түләүләр (ЕДВ) дә 5,4 процентка артачак. Әлеге түләүләргә кергән социаль хезмәтләр җыелмасына кагылышлы үзгәрешләр дә бар. Билгеле булганча, социаль җыелманы акчалата да алырга мөмкин. Акчага әйләндергәндә, ул хәзер 1048 сум 97 тиенне тәшкил итәчәк. Аның - 807,94 сумы- авыруны дарулар, медицина эшләнмәләре белән тәэмин итү, 124, 99 сумы - шифаханәгә юлламалар алу, 116, 04 сумы дәвалану урынына барганда тимер юлы, шәһәрара җәмәгать транспортында бушлай йөрү өчен каралган. Кеше вафатыннан соң җирләү өчен бирелә торган пособиенең суммасы да артты, хәзер ул 5562 сум булды.

Светлана Гайдук, пенсияне яшьтән үк кайгыртырга киңәш итте.
- Пенсия - ул яшьлектә эшләгән өчен картлыкта дәүләттән бирелә торган компенсация. Шуңа да бу өлкәдә хәзердән үк игътибарлы булу сорала. Кайбер оешмаларда эшләүчеләргә хезмәт хакы түләнсә дә, пенсия взнослары тотылмый. Бу өлкәдә кагыйдә бозулар булмасын өчен, һәркемгә үз пенсиясенең ничек исәпләнүен пенсия фондының рәсми сайтында шәхси кабинетыңда карап барырга була, - диде Светлана Гайдук.

Пенсия өлкәсендәге үзгәрешләр турында борчыган сорауларыгызны (843) 562 50 03, 89178516962 телефоны аша юллый аласыз. Газетабызның киләсе саннарында бу теманы тулырак яктыртачакбыз.

^{Фото: topnews.ru}