Татарстандагы лагерьда бала өстенә футбол капкасы төшкән (+видео)

Видеокамераларга эләккән кадрларда балаларның чиратлап футбол капкасында тартылулары күренә. Бервакыт яшүсмерләр икесе бергә асылынып тора һәм малайларның авырлыгын күтәрә алмыйча конструкция аларның берсе өстенә килеп төшә. Зыян күргән 13 яшьлек малай Әлки районы Базарлы Матак авылыннан. Аны авыр хәлдә ДРКБ реанимациясенә китергәннәр. Баланы хирург, травматолог, яңак-йөз хирургы, ортопед тикшергән, КТ ясалган. 

"Баланың хәле тотрыклы авыр. Ул үз аңында, мөстәкыйль сулыш ала. Аны ДРКБ реанимациясенә салдылар",-дип хәбәр итте хастаханәнең матбугат хезмәте.

Әлеге хәлдән соң «куркынычсызлык таләпләренә җавап бирми торган эшләр башкару яки хезмәт күрсәтү» маддәсе буенча җинаять эше кузгатылган. Бу хакта Татарстан буенча Тикшерү идарәсе матбугат хезмәтендә хәбәр иттеләр.
Бу көннәрдә "Волга" яшьләр үзәгендә 10-14 яшьлек яшүсмерләр ял итә. Күпчелек очракта, алар имин булмаган гаиләләрдән һәм полициядә исәптә торалар. 

27 март көнне Әлки районы мәктәпләренең берсендә эшләүче тренер тыныч сәгать вакытында үзенең тәрбияләнүчеләре белән бергә уеннар өчен әзерләнмәгән футбол кырына чыккан. Лагерь администрациясе рөхсәтеннән башка гына яшүсмерләр үзәк мәйданга футбол капкасын алып килеп куйганнар. Бу факт видеокүзәтү камераларыннан алынган язмалардан ачыкланган. Капкада сикерү һәм тартылулары аркасында конструкция әйләнеп капланган һәм яшүсмер өстенә килеп төшкән.