"Татфондбанк" аша салым түләгәннәр закон таләп­ләрен үтәгән дип санала

Бу хакта салым идарәсе комиссиясенә 20 миллион сумнан артык суммада 297 мөрәҗәгать кабул ителгән, дип хәбәр итте «Татар-информ»да узган матбугат конференциясендә Федераль салым хезмәтенең Татарстан идарәсе башлыгы урынбасары Андрей Никиташин. «Татфондбанк» аша салым түләүчеләрнең акчалары, банк белән бәйле вазгыять аркасында, тиешле органнарга барып җитмәгән иде. Нәтиҗәдә былтырның 30 декабрендә «Татфондбанк» аша салым түләгән эшмәкәрләрне бурычлылар рәтенә кертмәскә һәм аларга пенилар өстәмәскә дигән карарга килделәр. Шул ук вакытта салым акчалары бюджетка күчмәгән булып исәпләнде. Акчалар ике арада «эленеп торды».