«Түбәтәй» ретротрамвае экскурсияләр сезонын башлады

Ул тимер юл вокзалыннан елга портына кадәр һәм кире юнәлештә 2 нче боҗра маршруты буенча хәрәкәт итә, дип хәбәр итә шәһәрнең Туризмны үстерү комитеты. Казанның Туризмны үстерү комитеты директоры Дарья Санникова, «Метроэлектротранс» МУП генераль директорының гомуми мәсьәләләр буенча урынбасары Данил Фомин, шулай ук шәһәрнең туроператорлары һәм экскурсоводлары беренче рейс пассажирлары булды.

1986 елда чыгарылган раритет трамвайны экскурсияләр өчен махсус реставрацияләгәннәр. Зәңгәр вагон милли колорит белән буялган – алгы өлешендә бабайның йөзе сурәтләнгән, ә түбәсендә түбәтәй урнаштырылган, дип яза kzn.ru.

Ретротрамвай җәйге сезон дәвамында көн саен 17:00 сәгатьтән йөриячәк. Юлда пассажирларга шәһәрнең төп истәлекле урыннары турында җиде телдә – рус, татар, инглиз, кытай, испан, француз һәм немец телләрендә аудиотарих тәкъдим ителә.

Трамвай 22 пассажирны сыйдыра, бер әйләнешне ул 40 минут эчендә үтә. Гаризалар «Метроэлектротранс» предприятиесенең диспетчерлык телефоны буенча кабул ителә: +7(843)533-70-90.

Фото: Денис Гордийко