Ун көн кыл гел игелек кенә

Балалар һәм яшьләр эшләре буенча комитет рәисе Айрат Фәизов «эшлекле дүшәмбе» киңәшмәсендә: «Җәмәгать туклануы предприятиеләре ярдәмендә Борһан Шәһиди урамында «Добрый фудтрак» машиналары мохтаҗларны кайнар ризыклар белән бушлай сыйлый», – диде.

– Игелек декадасы мәктәпләрдәге кечерәк ярминкәләрдән башланган иде, – диде шәһәр башкарма комитеты җитәкчесе Денис Калинкин. – Шуннан соң паркларга чыктык. Проектка хәйрия фондлары, хәтта җәнлекләрне яклаучылар да кушылды. Хәйрия чараларында күбрәк кешеләр катнашсын. Шул вакытта гына без үзебезне игелекле Казан дип әйтә алырбыз.

Кайда, нәрсә?
6 сентябрь. Горький исемендәге үзәк мәдәният һәм ял паркында «Язмыш бүләге» приюттан этләр алган гаиләләр фотокүргәзмәсе була. 
6-8 сентябрь. «Акчарлак» бассейнында дауна синдромы авырулы балалар йөзү буенча «Бергә җиңәбез» Бөтенроссия ачык турнирында катнаша. Балалар экскурсиягә дә алып барыла.
7-9 сентябрь. «Волга» яшьләр үзәгендә «Игелекле футбол» турниры үткәрелә. Татарстанның 16 командасы көч сынаша. 
8 сентябрь. Горький исемендәге, Урицкий исемендәге, «Континент» паркларында, Горки-Әмәт урман паркында 10.00-14.00 сәгатьләрдә мәктәп укучыларының хәйрия ярминкәләре була. Балалар ясаган әйберләрне сатудан кергән акча хәйрия фондларына күчерелә.
12 сентябрь. Велосипедта узышлар.