Усад прогимназиясе WorldSkillsка Хорватиядән килүчеләрне кабул итәчәк

Билегеле инде  мондый зур  эш мәктәп - гимназияләр ярдәменнән башка гына булмый. Башкалабызның Яшел Үзән һәм Лаеш районыннан барлыгы 57 мәктәп кунаклар белән очрашуга, аларны каршыларга әзерлекне күптән башлап җибәрделәр. 2016 елда гына ачылуына карамастан, бу җваплы эшне Усад прогимназиясенә дә ышанып тапшырганнар -  аларга 22 август көнне Хорватиядән иллегә якын кунак киләчәк. Бу очрашу вакытында  чит ил вәкилләре үзләренең илләре,  андагы һөнәрләр,  мәдәниятлары турында сөйләячәк. Татарстан турында  да күбрәк белеп китәчәкләр.   Апрель азагының бер көнен  шушы җаваплы эшнең репетециясе буларак уздырдылар Усадта.

- Без кунаклар белән үзебезнең укыту тәҗрибәсен уртаклашырга телибез, - ди прогимназия директоры  Эльвир Якупов.  - Бездә күрсәтер, уртаклашыр әйберләр күп. Беренче сыйныфтан ук эшче һөнәрләргә мәхәббәт тәрбияләргә тырышабыз.

Әлеге уку йортында спорт  та  югары урында тора. Укучылар  15 секциянең үзләре теләгәнен сайлый алалар.  Акробатика аеруча популяр. Усадта менә берничә ел  рәттән көрәш буенча  республика бәйгесе уздырыла. Анда Татарстаннан гына түгел, күрше республикадан да көчле егетләр җыела.

Балалар бакчасына йөрүче һәм башлангыч мәктәп укучылары “Наураша” лабораториясенә бик теләп йөри. Анда алар кечкенәдән  эшче һөнәрләрнең, физика, химия, биология кебек фәннәрнең серләренә уен  ярдәмендә төшенәләр. Лего җыялар.